12. maí 2012

Kæru leikfélagar.
Miðvikudaginn 30. maí verður aðalfundur Leikfélags Mosfellssveitar haldinn í Bæjarleikhúsinu. Vonumst til að sjá sem flesta!


        
 
    

10. maí 2012 

Í nógu verður að snúast í Bæjarleikhúsinu í sumar eins og undanfarin sumur. Leikfélag Mosfellssveitar býður upp á Leikgleði, fjölbreytt námskeið fyrir börn á aldrinum 6-16 ára. Námskeiðin hafa notið mikilla vinsælda og er nú þegar að verða uppbókað á nokkur. Á námskeiðunum vinna nemendur með sjálfstraust, framkomu og framsögn, sigrast á feimni og kynnast hinum ýmsu þáttum sem snúast að leikhússtarfi. Í lok hvers námskeiðs er sett upp sýning sem hentar hverjum aldurshópi. Elsti hópurinn (13-16 ára) hefur undanfarin ár sett upp metnaðarfullan söngleik. Í fyrra var söngleikurinn Hársprey settur á svið og voru sýndar átta sýningar fyrir fullu húsi.

Laugardaginn 23. júní opnar leikhúsið dyrnar á gátt og býður gestum að koma og skoða aðstöðuna, spjalla við kennara og eldri nemendur, prófa leiklistarleiki á sviðinu og grilla pylsur. Auk þess geta allir sem hafa einhvern tímann sótt námskeið hjá Leikgleði, eða eru að koma í fyrsta skipti í sumar, komið í myndatöku og skráð sig hjá Leikgleði. Mörg fyrirtæki hafa haft samband við leikfélagið þegar þeim vantar unga leikara í verkefni og því er kominn tími til að safna öllum saman á skrá. Hver veit nema einhver fái hlutverk í stórmynd í kjölfarið.

Allar nánari upplýsingar og skráning á námskeiðin er á www.leikgledi.tk.
     
     
 
 
 

13. mars 2012

Föstudaginn 16. mars verður leikritið Andlát við jarðarför frumsýnt hjá Leikfélagi Mosfellssveitar. Leikritið er byggt á bresku kvikmyndinni Death at a funeral eftir Dean Craig og leikstjóri er Guðný María Jónsdóttir. María Guðmundsdóttir ásamt Guðnýju Maríu sáu um handritsvinnu. Eva Björg Harðardóttir hannar leikmynd og búninga og Hörður Guðjónsson lýsingu.

Leikritið fjallar um fjölskyldu sem hittist í jarðarför fjölskylduföðurins. Eldri bróðirinn, sem enn býr hjá foreldrum sínum ásamt konu sinni, tekur að sér  að skipuleggja jarðarförina og flytja minningarorðin. Það sem upphaflega virtist vera tiltölulega einfalt verkefni verður honum hins vegar fjötur um fót þegar
 alls kyns óvæntar uppákomur gera jarðarförina að algjörri matröð. Ofskynjunarlyf, óþolandi gömul frænka, hrokafullur bróðir og kvennabósi, tuðandi eiginkona og svo dularfullur gestur úr fortíð föður hans sem reynir að afhjúpa hneykslandi leyndarmál hins látna.

Alls taka um tuttugu manns þátt í uppsetningunni en sýningar eru í Bæjarleikhúsinu við Þverholt í Mosfellsbæ. Þetta er bráðskemmtileg og fyndin sýning sem enginn má láta framhjá sér fara.

Næstu sýningar eru sem hér segir:

Föstudaginn 16. mars kl. 20:00
Sunnudaginn 18. mars kl. 20:00
Föstudaginn 23. mars kl. 20:00
Sunnudaginn 25. mars kl. 20:00
Föstudaginn 30. mars kl. 20:00
Laugardaginn 31. mars kl. 17:00.

Miðaverð er 2000 krónur og miðapantanir eru í síma 566 7788.


     

28. febrúar 2012

Dagur Listaskólans verður með frábrugðnu sniði í ár. Áhugavert og spennandi námskeið verður haldið laugardaginn 17. mars, þar sem unnið verður að smíði "tónverks" . Námskeiðið er opið öllum sem stunda nám í tónlistardeild Listaskólans, eru í Skólahljómsveitinni, í Myndlistarskólanum, eða eru í starfi Leikfélagsins og eru á aldrinum 12-16 ára, þ.e. fæddir á árunum 1995 – 2000.

Námskeiðið fer fram í sal Varmárskóla. Mæting er kl 09.30. Unnið er til kl. 12.00 og þá er boðið uppá pizzuveislu og svo unnið aftur frá 13.00- c.a. 15.00. Tónleikar verða kl. 16.00 fyrir foreldra og aðra gesti. Skráning fer fram á skrifstofu Listaskólans (Háholti 14, 4. hæð) kl. 13.00 – 17.00 og lýkur skráningu 5. mars. Innheimta þarf smá þátttökugjald eða 1000 kr. Við skráningu þarf að koma fram nafn, kennitala, sími og hvort/hvaða hljóðfæri viðkomandi spilar á. En það er líka hægt að taka þátt án þess að kunna á  hljóðfæri.

Þetta verður mjög skemmtilegt og áhugavert og eru nemendur hvattir til að taka þátt og skrá sig sem allra fyrst! Unnið er með hópnum að því að spila og skapa tónverk, sem er svo flutt fyrir foreldra og gesti í lok dags.Allir spila á hljóðfæri í verkefninu og þeir sem eru í tónlistarnámi mæta með sín hljóðfæri og nota þau. Nemendur koma til með að spila lærða kafla í tónverkinu, en fá einnig tækifæri til að semja sína eigin hluti, sem eru tvinnaðir saman í verkið, sem og textagerð. Hugmyndin er sú að allir fái að njóta sín, og eru jafn mikilvægir verkefninu, hvort sem um skólaðan tónlistarnemanda er að ræða eða óskólaðan.
 
Stjórnendur verkefnisins eru Þórdís Heiða Kristjánsdóttir og Hildur Guðný Þórhallsdóttir, en þær hafa unnið þessi verkefni víða undanfarin ár í grunnskólum og tónlistarskólum.
  
 

29. janúar 2012

Nú eru hafnar æfingar á leikritinu Andlát við jarðarför hjá Leikfélagi Mosfellssveitar. Undanfarna daga hafa staðið yfir miklar framkvæmdir við sviðsmyndargerð, en stefnt er að frumsýningu í mars. Leikstjóri sýningarinnar er Guðný María Jónsdóttir, en alls taka yfir tuttugu manns þátt í uppsetningunni.



  

22. nóvember 2011

Það er sannkallað jólafjör í jólasýningu Leikfélags Mosfellssveitar, en sunnudaginn 20. nóvember var barnaleikritið Verkstæði jólasveinanna frumsýnt í Bæjarleikhúsinu. Leikstjóri er Stefán Bjarnason. Í sýningunni fylgjast áhorfendur með undirbúningi jólanna hjá jólasveinunum á verkstæði jólasveinanna. Leikritið er fullt af gleði og söng og var uppselt á fyrstu tvær sýningarnar. Næstu sýningar verða sunnudagana 11. og 18. desember kl. 14. Miðapantanir eru í síma 566 7788 og miðaverð aðeins 1000 krónur.

13. október 2011

Í tilefni af 35 ára afmæli Leikfélags Mosfellssveitar verður haldin
afmælishátíð í Bæjarleikhúsinu dagana 1.-4. nóvember.

Þriðjudaginn 1. nóvember kl. 20 Sýningin Mórar og meyjar ásamt Tindatríói. Höfundar María Guðmundsdóttur
og Birgir Sigurðsson.
 

Miðvikudaginn 2. nóvember kl. 20 Sirkuslistir og sýnikennsla með Agli Wild.
 

Föstudaginn 4. nóvember kl. 20 Opin æfing. Komdu og fylgstu með!

 
Við hvetjum bæjarbúa til að mæta í leikhúsið og gleðjast með okkur!

Aðgangur ókeypis.

19. mars 2011

Vegna frábærrar aðsóknar hefur verið ákveðið að bæta við fjórum aukasýningum á ALLSKONAR ELVIS í Bæjarleikhúsinu:

Föstudaginn 25. mars kl. 20 - UPPSELT
Föstudaginn 25. mars kl. 23 - Örfá sæti laus
Sunnudaginn 27. mars kl. 20
Föstudaginn 1. apríl kl. 20

Miðapantanir eru í síma 566 7788 og miðaverð aðeins 1500 krónur.

Hlökkum til að sjá ykkur í leikhúsinu!


  
  

19. mars 2011

Við hvetjum alla til að gerast vinir Leikfélags Mosfellssveitar á Facebook. Þar er mikið af myndum frá ALLSKONAR ELVIS.


     

18. febrúar 2011

Í kvöld verður sýningin Allskonar Elvis frumsýnd hjá Leikfélagi Mosfellssveitar. Sýningin  er unnin úr hugmyndum um kónginn sjálfan, Elvis Presley, en er þó langt frá því að vera ævisaga hans. Fjöldi manns kemur að sýningunni bæði leikarar, dansarar, söngvarar, hljóðfæraleikarar og aðrir listamenn. Leikstjóri er Ingrid Jónsdóttir og um tónlistina sjá Birgir Haraldsson og Hljómsveitin 66. Við hvetjum Mosfellinga til að kíkja í leikhús allra bæjarbúa og njóta frábærrar kvöldstundar sem kitlar hláturtaugarnar. Nánari upplýsingar má finna á facebook síðu félagsins og heimasíðu LM, www.leikmos.is.

Næstu sýningar verða:
Sunnudaginn 27. febrúar kl. 20
Föstudaginn 4. mars kl. 20
Föstudaginn 11. mars kl. 20
Föstudaginn 18. mars kl. 20
Miðapantanir eru í síma 566 7788 og miðaverð 1500 krónur.